【槓桿致勝】揀騰訊CALL/PUT宜由輪價入手

【Now財經台】騰訊控股(00700)王牌遊戲《王者榮耀》國際伺服器，上線東南亞及歐美等市場，正式走向全球化，但騰訊股價今日(24日)仍跟隨大市向下。騰訊中長身，仍有逾百日先到期嘅價外CALL，市場上都有唔少選擇，價外10%、25%，甚至35%都有，行使價介乎430元至510元，槓桿7至9倍，應該點揀好？

中信里昂股權衍生品銷售經理李佳原認為，若投資者唔知想揀咩類型嘅產品，但又唔想將槓桿攞到最盡，可以簡單啲由輪價入手，例如可以留意輪價係0.1元至0.2元嘅CALL或PUT輪，投資者可以避開年期超短，價格幅度好大及高槓桿，但風險極高嘅論證，相對上喺槓桿、年期及價格方面，取中庸之道。