【股市脈搏】博金朝陽私有化有排「坐」
【分析】 2022/08/12 15:36
【Now財經台】金朝陽集團(00878)停牌2日後,今朝復牌高開逾9%後,升幅一度擴大至逾15%,高見7.25元,一口氣升穿10天、20天、50天及100天線。
金朝陽持有唔少銅鑼灣、尖沙咀等貴價地段物業,較為人熟悉嘅係2幢位於時代廣場附近嘅金朝陽中心,公司噚晚宣布擬出售持有嘅希雲大廈,作價逾32億元,出售後,估計公司淨袋近6億元,但冇提及用作派息。
金朝陽股價今日大升,市場似乎係憧憬公司私有化,依家公司資產淨值較股價大幅折讓90%,加上大股東傅金珠家族揸住74%股權,出售套現後,集團進一步邁向淨現金公司,不過,要留意金朝陽平時交投疏落,想博私有化,除咗好難有承接,相信都有排「坐」。