【槓桿致勝】買港交所CALL等升窩又升價

【Now財經台】港交所(00388)股價連跌兩個交易日，今朝(8日)一度轉升逾1%，高見230元，其後升幅收窄至0.6%，半日收報227.8元。資金流方面，好倉連續5日都流入，5日合計有2735萬元資金坐貨，係個股中最多。

今朝成交活躍嘅CALL輪9月至明年1月到期，槓桿做到4至9倍。至於活躍嘅牛證距離收回價3%至12%，槓桿7至20倍。

中信里昂股權衍生品銷售經理李佳原表示，近排港交所冇消息就逆市下跌，今日(8日)大市回升至近17000點，距離去年恒生指數喺同水平股價「陰跌」10%。佢建議想博正股V彈嘅好友，揀CALL以避免收回價風險，並指正股急升下，引伸波幅有機會跟住上升，出現投資者津津樂道嘅升窩又升價嘅情況。

Sam續指，牛證更適合慢升慢跌嘅市況，一旦正股再有一波加速下跌，牛證喺股價反彈前有被收回嘅風險。