【輪證下半Part】等收市

【now.com財經】今日喺呢度無做過任何動作，即使喺作戰室，都只係喺開市無耐出一注淡倉，近近地望住五分鐘圖上嘅50分鐘線(五分鐘圖10線)，之後都無再出過任何倉，以上半場高低位20,283點/20,096點計，今朝早個波幅都只係得187點，大家真係隨時可以睡到三點，等歐洲開市。

睇返大方向圖，日線圖上見指數仍然被10天線頂住個頭頂，Slow STC(14,3)兩線呈上都好似無乜用，或者比較麻煩嘅係保歷加通道有收窄情況：更加限制住指數活動空間。

基本上呢個走勢喺一啲大價、重磅藍籌股身上都會搵得到，例如阿里巴巴(09988)，佢比恒指更好頂就係噚日(8月4日)開始已經喺條10天線以下位置，就算佢噚日收市後出咗份業績幾咁符合市場預期都好，都係預咗佢會受制於10天線而向下落一下，作戰室有講過，連今朝嘅【每日一股】都有講過，不論過夜定即市都可以捕捉得到。

「咁恒指有10天線頂住唔落...係咪出淡倉博一博呀？」都唔好，一來今日星期五，二來指數目前嘅位置企近熊證街貨，就算今日有新牛上市，下個星期一(8日)返嚟將會見到最貼價牛為20,000至20,099點，但呢層只係得五隻牛證，可以儲到幾多街貨出嚟？

依家1點27分，指數做緊20,140點，跌33點；都係繼續等收市啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

作戰室入口：https://www.patreon.com/cbbcwar

專頁：https://bit.ly/3uixP4Y