【全民打新】李澤銘:若坦博爾肯預留水位有得炒

【Now財經台】內地成熟專業戶外服飾品牌坦博爾(Tanboer)，上月已通過港交所(00388)上市聆訊，預期短期內將會招股。睇返坦博爾業績，3大產品線都有唔錯嘅表現，尤其公司食正疫後流行「輕戶外」嘅生活模式，帶動去年收入增速加快至68%，毛利率維持約56%，行業前景吸唔吸引？

Blue Water Capital投資總監李澤銘指，行業前景穩定，零售服裝呢個賽道嚟講增長都算快，加上好多新型運動喺內地都比較流行，貼合「輕戶外」主題，滑水、滑雪、網球等帶旺相關服裝銷售，不過，呢類「快速消費品」(Fast Moving Consumer Goods)門檻低、競爭大，前景值得關注。

Alan又話，近期新股市況的確差少少，之前隻隻新股都可以爆炒，依家市場睇新股時考慮都會多咗，零售服裝行業方面，H股估值唔會太高，所以要爆炒機會真係唔大，不過，如果坦博爾定價較保守，肯預留一啲水位，若成功上市，相信股價都好大機會有唔錯嘅升幅。