【槓桿致勝】CALL SPDR金應該點揀？

【Now財經台】國際金價近期喺每盎司4800美元水平徘徊，SPDR金ETF(02840)就喺3400元樓上橫行，企穩10天線。資金流方面，過去5日，好倉及淡倉分別有43萬元、39萬元持倉，都係以「坐貨」為主，近期金價波動性唔大，投資者應該點部署？

星展香港環球金融市場上市產品主管周國威表示，黃金自第1季美伊開戰以來，已由過往嘅避險資產變成風險資產，當市場風險胃納增加時，金價走勢會偏強，但避險情緒升溫時，由於投資者早前累積咗唔少黃金利潤，又或者較遲入場，導致金價波動性較大，直至近期美伊局勢略現曙光，金價回升，近期買賣波幅相對收窄，雖然未必再係市場炒作焦點，但中長線嚟睇，黃金暫時仍跑贏大部分資產，同埋仍有對冲美元嘅作用。

投資部署方面，Dick建議採取相對保守策略，可以選擇年期較長及輕微價外產品，市場上較熱門嘅部署係今年9月到期，行使價價外約10%至20%，槓桿約8倍嘅SPDR金ETF CALL輪。