【名家給力場】紫金吞赤峰後下一步私有化？

【Now財經台】紫金礦業(02899)斥資近183億人仔入股赤峰黃金(06693)，將會攞到赤峰嘅控制權，不過，由於赤峰大折讓向紫金配股，拖累兩家公司股價今日(23日)插水，赤峰一度瀉近26%，紫金就曾經大跌逾7%。紫金今次入主赤峰係咪可以產生協同效應，進一步鞏固喺全球嘅領導地位？

《香港股票財技密碼》作者梁杰文指，今次呢單Deal都係有跡可尋，赤峰喺香港上市時紫金都有入股，係持股較多嘅基投，入股近1年對赤峰背景及營運狀況都有一定了解，加上赤峰創辦人已離世，遺孀就接手佢嘅股份，可能希望把握時機賣盤套現，促成咗呢單Deal。

值得留意係，復牌通告冇提及會撤銷赤峰嘅上市地位，紫金去年完成分拆紫金黃金國際(02259)喺香港上市，公司點解要咁多個上市平台，未來會唔會私有化赤峰？

Mike認為，紫金私有化赤峰會係一個中長線問題，佢亦認同紫金已經有紫金黃金國際，可能真係唔需要咁多個上市平台，加上赤峰市值亦唔係一個天文數字，只係700幾億至800幾億元，紫金絕對有呢個財力，但赤峰去年先至上市，相信1至2年內仍會維持佢嘅上市地位。