【槓桿致勝】阿里博反彈CALL/牛仔點揀？

【Now財經台】阿里巴巴(09988)業績差過預期，股價持續受壓，除咗失守10天線，股價兩個交易日累跌逾10%，今朝(23日)一度跌3.3%，低見119.5元，見到唔少好友部署牛證博反彈，擺位都幾貼，收回價約110元，槓桿介乎20倍至30倍，值唔值博？還是揀價外20%至30%嘅CALL輪，槓桿普遍都有近10倍，係咪會穩陣啲？

中信證券國際股權衍生品銷售經理李碧珊指，阿里出完業績後，見到資金仍傾向用好倉博反彈，但股價今日仍然弱勢，仲失守120元關口，今日即市博反彈嘅投資者唔多，收回價約110元呢批牛證，都分為100對1及500對1，後者輪價比較仙啲，約2至3仙，如果想喺110元水平做自動止蝕，呢批牛證都可以考慮，但槓桿僅約10倍，投資者可以用注碼控制風險。

CALL輪方面，Percy就話，都見到有資金做部署，但行使價未必會揀價外20%至30%，因為市況仍然不明朗，加上阿里股價仍弱勢，RSI處於超賣水平，見到入場資金都揀一啲中線條款，價外約10%，7月或8月到期，槓桿約7倍。