【FINTERVIEW】內地汽車補貼唔可以停(上)

【Now財經台】中央經濟工作會議強調要谷內需，主要以延續已出台嘅政策為主，摩根士丹利認為，汽車仍會係明年重點補貼對象，一旦唔保住汽車銷售，明年經濟增長好難達標，但大摩認為，每部車嘅補貼可能會減少，最終或會影響車廠盈利能力，以龍頭比亞迪股份(01211)為例，今年第3季盈利倒退，股價持續弱勢，汽車銷售疲態似乎愈來愈明顯？

資深經濟學家林樵基指，過往中國經濟好依賴外貿，但美國總統特朗普(Donald Trump)上台後，中美持續出現貿易糾紛，所以中國好難再靠外貿推動經濟，所以谷內需係非常重要。

汽車補貼方面，佢認為，中央喺呢方面要好審慎，始終太多車企、供應過多都唔係好事，估計市場未來會逐步淘汰更多競爭力弱嘅車企，但由於汽車生產過程中，涉及太多唔同行業及就業機會，都有助推動經濟，因此，預期中央會繼續提供補貼。