【槓桿致勝】快手CALL/PUT點部署？

【Now財經台】快手(01024)今日(19日)會出業績，快手股價今朝平開後，持續向下，一度跌逾2%，低見62.85元，不過，快手好倉受資金追捧，5日累計，有逾900萬元坐貨，市場普遍睇好快手業績，業績前引伸波幅有冇變化？如果部署CALL輪縮窩風險大唔大？多唔多人部署牛證？

滙豐亞太區財富管理香港上市產品銷售經理盧貴良指，雖然市場預期快手上季淨利潤按年增長28%，但股價仍較弱，暫時已連跌5個交易日，但呢幾日都有資金不斷加倉，揀CALL多過牛證，CALL連續6個交易日有資金流入，合共約200萬元，引伸波幅已由50樓上跌到46，但估計出咗業績都唔會大跌。

佢續指，揀CALL要留意條款，例如行使價88元，價外約40%，明年7月到期，槓桿做到5倍。淡倉方面，可以揀PUT輪做睇淡部署，可以考慮行使價50元，今年12月到期嘅條款，如果揀熊證做部署就勝在實際槓桿較高。