【專家分析】買聯想博追美同業落後

【Now財經台】摩根士丹利估計，人工智能個人電腦(AI PC)浪潮會喺下半年殺到，聯想集團(00992)6月會推出兩款新AI電腦，配備微軟(Microsoft)Copilot+功能，市場反應值得留意，聯想明日(23日)會出業績，大摩以「Underappreciated Stock」形容聯想，仲話市場忽略咗呢隻股票，將評級上調至「增持」，並大幅上調目標價逾60%至15元。聯想股價今日(22日)衝上9年高位，明日出爐嘅業績係咪值得期待？股價仲有幾大上升空間？

南華金融集團副總裁莫灝楠指，聯想主業係PC，另一瓣業務數據中心業務，因為市場需求大，增速達30%至40%，會令市場對聯想業績有憧憬，不過，由於唔知數據中心業務會唔會飽和，加上利潤率唔高，認為聯想現價已升凸咗，雖然短期仍然強勢，但股價的確貴咗少少。

Casper表示，戴爾(Dell)等同樣有AI業務嘅股份，市盈率(PE)已升至逾30倍，聯想PE只係逾10倍，如果相信AI熱潮持續，抱追美國同業落後心態買聯想亦無妨，短線支持位睇10.5元。