【Now財經台】兩隻消費電子產品股聯想集團(00992)及小米集團(01810)，午後佔據表現最佳藍籌頭兩位，股價大升逾9%，衝破12元關口，其中，聯想喺「618」購物節期間，銷售額突破69億人仔，但翻查資料，2022年聯想全網銷售81億人仔，聯想今日炒起似乎未必同「618」購物節有關？
南華金融集團副總裁莫灝楠指，最近電子產品大減價，由於電腦要升級先有人工智能(AI)學習功能，引爆咗換機潮，有可能係電子產品股強勢嘅原因。Casper又話，聯想係全港衆多上市公司中最貼近AI嘅公司，其他科技股最多只係軟件開發商，短期唔可以透過模型賺錢，反而聯想提供硬件服務，提供數據畀開發商賺錢。
Casper又話，現時聯想唔係賣機殼、電腦咁簡單，已經幫手做緊數據中心，加上換機潮，投資者買多啲聯想嘅電腦都好正常，帶動聯想炒上。
