【財經TOP SEARCH】點解萬科有分拆消息仲要跌？

【Now財經台】截至早上11時止，1小時內《彭博》全球用戶關注度上升最多首5隻港股，依次為萬科企業(02202)、恒基地產(00012)、藥明合聯(02268)、華潤置地(01109)、創科實業(00669)。

萬科本周有債務要還息，日前就市傳集團同債權人新華資產商討債務延期被拒。雖然新華上周六(2日)即刻發聲明重申，同萬科保持正常嘅業務合作，但仍然引起市場憂慮萬科嘅流動性問題。

雖然集團其後公布計畫分拆物流園資產，並以基礎設施房地產信託基金(REIT)喺深交所上市，萬科今朝股價仍要喺大成交下急插逾6%，午後繼續尋底，跌幅擴大至7%，並創歷史新低5.56元。

富昌證券聯席董事譚朗蔚認為，分拆消息谷唔起股價，因為萬科剝離物流園資產上市後或會降低資產質素，如果分拆成功，集團就會失去一批優質資產嚟粉飾一堆未建成嘅項目同債務。

Stevan又話，萬科爭取債務延期失敗嘅消息未必係空穴來風，未來要繼續關注集團流動性問題，並指之前集團獲地方政府支持，令市場有返少少信心，而家一有風吹草動股價就大成交下跌，更出現持續尋底嘅趨勢，提醒投資者要審慎入市。