【輪證贏家】唔好同街貨作對

【now.com財經】噚日上半場出咗隻淡倉，由開市玩到中午收市之後，下半場喺作戰室都等咗好一段時間先至偷到位出到一小注好倉，還好兩注都可以執到餐飯錢。

依家9點13分，大家都等緊完U後恒指報出嚟嘅開市價，睇返噚日指數喺日線圖嘅擺位，雖然指數仍然企於牛熊分界線之上，不過就被100/50天線夾住，Slow STC(14,3)兩線於高位出現觸頂回落，不過，保歷加通道仍然保持拓闊中。

而今日嘅牛熊證街貨圖亦見精彩，熊證街貨層當中，只得最近嗰兩層，即係20,100至20,199點，同20,200至20,299點呢兩層見先至有街貨流入，但其他嘅都見到係流出，都估計係似噚日指數下跌嘅時侯遠熊先行獲利離場；至於牛證方面，儲儲下見到有兩層過千張期指街貨喺度，分別係最貼價嘅19,500至19,599點，同埋保持重貨區地位嘅19,200至19,299點。博指數再上而出好倉揀牛證的話，揀嗰時都要留意一下啲街貨。

恒指今日開市點數變幅都係唔大，跌49點，報19,863點。日線圖擺位上仍然被困於100/50天線之間，以依家開市前睇日線嘅50天線(約19,690點)計，即使落到呢個位仍然對牛證未有絲毫損傷，因為牛證第一層見19,500至19,599點。

今日要做YT節目，一心難幾用之下，都總算幫作戰室先開第一注淡倉正數。嚟到10點5分，恒指跌幅已經擴大至跌195點，報19,717點，最低見過19,675點，稍稍低於日線圖上嘅100天線(依家見19,687點)，目前算是跌幅收窄兼有喘定，換言之，可以暫時睇住呢個位當比到指數有支持。

「咁即係可以吼住指數落到100天線時出好倉博佢回返上去囉？」技術上如果佢唔破位嘅話就可以嘅，不過，返番去牛熊證街貨圖上見牛證其實真係儲落唔少街貨，向下衝落去都真係唔出奇，又向來技術分析 VS 街貨嘅話，10次有8次都係街貨贏，所以玩逆順都有啲危險。

恒指熊(66742)，收回價20,168點，同現價有約470點差距，喺一地街貨之下搵到呢隻街貨少於10%，而槓桿都有約37.16倍，都要謝主隆恩。

即出唔反對，安全嘅如常等返五分鐘圖Slow STC(14,3)上返超買位先至出亦都可以。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。

作戰室免費試用，詳見專頁：https://bit.ly/3uixP4Y