【now.com財經】噚日揀咗隻恒指熊(66742)，諗住比啲耐性等返五分鐘圖Slow STC(14,3)上返超買位先至出手。但一等就等到下晝2點55分先至見到，咁晏出貨Day Trade都變真‧Day Trade，所以如果確實係預咗過夜的話，注碼上要留意一下。
既然符合出貨條件，(66742)亦可以小注出動。以噚日2點55分至2點25分期間，五分鐘圖Slow STC(14,3)處於超買而符合落場條件計，期內(66742)高低位做過0.062元/0.058元，平均買入價為0.06元。
及到尾市，五分鐘圖Slow STC(14,3)都未見佢回返落去超賣位，(66742)唯有過夜；記得記得過夜注同Day Trade注係有分別，因為Day Trade有咩事你可以即走，但過夜注的話，要第二日先至可以報到仇。
今朝起身先到隔晚美股跌245點，而恒指ADR都見下行，揸住(66742)過夜似乎都應該無大礙；不過今朝同作戰室戰友複習一下噚日五分鐘同小時圖時，留意到小時圖已經回到落保歷加底線，同時有50小時線&250小時線喺下方接住...一切都要等恒指完U之後先至有答案。
終於等到恒指完U，低開301點，報19,305點，呢口開市價先將熊證首兩層街貨全數收回，呢度已經有過千張期指無咗，而第一層過千張牛證街貨19,300至19,399點，亦只係得返5點生命值。再到正式開市之後，指數雖然未見向下即瀉，不過依家9點33分，最低見過19,293點，換言之19,300至19,399點都掰，今朝2,103張期指街貨就係咁做咗早餐。
至於隻(66742)，當然可以趁指數低開300點就食咗佢啦，如常的用10分鐘作為走(66742)的話，以今朝9點30分至9點40分走貨計，期內高低位見過0.084元/0.081元，平均走貨價為0.0825元。呢一趟過夜貨平均袋22.5格/37.5%。
過夜貨走人一身輕，依家9點49分，恒指目前仍然處於低位徘徊，但喺五分鐘圖上開始見到佢行「長方形」，相信大家都等睇佢殺埋19,200至19,299點重貨區，又咁講，一早吞咗2,000幾張期指嘅同時，如果你手持收回價係19,200點呢個範圍嘅牛證，你見到個市咁，你走唔走？隨時向下退戰線至19,000點或樓下都唔出奇。
等到10點打後，五分鐘圖上仍然見到指數行緊長方形，而小時圖150線亦似有支持，唔通今朝恒指裂口低開之後就等4點收工？反正(66742)過夜貨都食咗，佢變成點都唔關事Lu。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
