【FINTERVIEW】領展「抽水」揭管治混亂？

【Now財經台】領展房產基金(00823)上市17年以來首次「抽水」，擬按「5供1」比例供股籌逾180元，以每基金單位供股價44.2元，較停牌前折讓約30%，一半用嚟還債，其餘就用作營運資本及探索未來投資機遇。集團稱，供股後可壯大資本基礎，淨負債比率降至低於20%。不過，分析員就唔賣帳，中信里昂及花旗都降領展評級，瑞銀更直指領展供股理據唔充分，指依家1個月Hibor由逾4厘，跌到最新約2.24厘，供股成本可達4.4厘，又話領展冇提及詳細轉型計劃。

資深投資者林一鳴指，對於領展今次供股嘅睇法較負面，甚至質疑管理層管理資金、營運嘅能力，領展由舊年7、8月開始一直有做回購，股價去年7、8月處於60元水平，8、9月更跌至逾50元水平，回購後又要供股，其實去年7月，其實已經知美國會加息，香港息口都會跟住上，但領展當時冇相關行動，只做回購，大半年後，就要投資者去供股幫公司還債，半年前應做嘢時唔做，依家供股資金又攞嚟還債，唔係擴充公司，加上香港、內地，以及外國嘅發展機會都唔多，反映管理層管治混亂。