【專家分析】比亞迪帶頭減價目的係...

【Now財經台】內地電動車龍頭比亞迪控股(01211)近日推「618」限時促銷優惠，上周五(23日)開始至6月底前，包括「王朝網」及「海洋網」合共22款車，平均減價近20%，其中，減幅最大係去年8月推出嘅「海豹07 DM-i」智駕版，高達34%，就連今年1月上市嘅「王朝網」系列MPV「夏」都減價10%以上，即係新車舊車齊齊減價，會唔會再引爆更激烈嘅減價戰？

博威環球證券金融首席分析師聶振邦指，新能源汽車市場競爭十分激烈，見到不斷有新車企冒起，例如近兩年市場關注度較高嘅小米集團(01810)。佢提醒，其他大型科技企業有可能會投放資源，支援小型新能源車企，從而令大型車企面對挑戰。

聶Sir續指，另1個原因可能係「五一黃金周」已經過去，要等到下一個長假期，例如暑假或「十一黃金周」先再有催化劑，所以比亞迪一過咗「五一黃金周」就開始有動作，包括減價係可理解。