【專家分析】港股科技有排捱？

【Now財經台】港股持續弱勢，不論外圍升跌，港股都係跌，主要係重磅科技股走勢差，恒生科技指數今日(23日)挫逾3%，個股方面，阿里巴巴(09988)今日失「紅底股」、美團(03690)就考驗招股價69元，科技股係咪離爆股災不遠？

元宇證券大中華區股票投資總監趙晞文指，依家大型科技股陷人一個困境，雖然終端需求減少，但核心業務仍Keep到，不過，喺新業務不斷燒錢下，加上人工智能(AI)要做巨額投資，導致盈利被蠶食，另一方面，之前對投資AI畫出嚟嘅大餅又冇影，導致市場唔賣帳，而市場上嘅資金量冇變，但科技股選擇就多咗，所以資金會分流。

他續指，股災是指股價或估值短時間內被壓，他認為現時唔係股災，又指科技龍頭估值逐步下跌，係一個壓縮過程，估計科指未來半年至1年都冇辦法擺脫呢個困局，除非科技巨頭後續業績，可以睇到公司投入已有回報，先有機會出現轉機。