【名家給力場】恒指25000關未必頂得住(上)

【Now財經台】美以伊戰事唔經唔覺即將進入第4個星期，有唔少跡象顯示美國總統特朗普(Donald Trump)唔想戰事拖得太耐，之前都放過風話戰事好快就會結束，不過，伊朗到依家態度仍然都好強硬，鬥長命、唔伯捱打係伊朗嘅強項，呢場戰事對環球股市，以至經濟嘅影響已逐步浮現，港股近日持續受壓，恒生指數守唔守得住25000點關口？

勝利證券首席顧問陳建良表示，全球股市都不宜睇得太樂觀，港股方面，雖然近日有唔少公司交出唔錯嘅業績，但估計恒指仍會下試25000點，以地平線機器人(09660)為例，出完業績後，股價今日(20日)一度勁升8.5%，高見7.87元，但之後升幅逐步收窄，僅升約1%，佢認為，可能要等大市跌得更多時，交到靚業績嘅公司，股價先可以彈得起。KL又估計，恒指3月好大機會跌穿25000點。

美股方面，陳建良認為，中東戰事對美國經濟嘅影響仍未完全反映，依家唔少中東資金都有投資美股，如果戰事持續下去，資金有機會減少流入美股，到時美股彈完就會掉頭向下。