【專家分析】3個買高偉電子的理由

【Now財經台】蘋果公司(Apple Inc.)概念股今日(3日)跟大市反彈，其中以高偉電子(01415)升得最靚，一度高見32.4元，大升近11%，係咩因素刺激股價爆上？

元宇證券大中華區股票投資總監趙晞文指，高偉股價早前持續受壓，主要係部件價格持續上升，市場擔心會打擊今年全球智能手機出貨量，喺呢個情況下，投資者會傾向選擇受衝擊較小嘅品牌。

佢又指，睇好高偉主要有3個原因，首先係產品周期優勢，今年係Apple嘅「大年」，加上同Google喺人工智能(AI)嘅合作，市場憧憬iPhone將引爆換機潮，其次係定價能力，雖然部件成本上漲，但Apple仍有能力將部分成本轉嫁畀消費者，或透過產品升級維持利潤，最後係供應鏈地位穩固，高偉對美國客戶嘅敞口係港股供應鏈相關公司之中最高，只要Apple業績好，高偉基本上都可以受惠。

晞文續稱，隨著產品單價及毛利率提升，預期高偉未來幾年收入、盈利將錄得複合增長，近期股價疲弱只係受制於市場對需求嘅短期憂慮，一旦呢啲憂慮消除，估值就有反彈空間。