【專家分析】比亞迪減價「追數」市場唔Buy

【Now財經台】比亞迪股份(01211)第2代秦PLUS上市，售價6.98萬人仔起，集團又宣布多個版本車型推出10月限時優惠活動，部分車型減價1萬人仔，新車開賣已經要減價，似乎唔係好事？

王道資本及家族資產管理執行董事黃敏碩指，減價促銷絕對唔係市場樂見嘅事，但踏入第4季，唔止比亞迪，其他車企都要「追數」，增加銷量不外乎推出新產品或降價清貨，現時比亞迪距離要完成全年銷量目標，即460萬部仍有一段距離，除咗行業競爭，缺乏亮點都令集團銷售表現一般，加上近期公布嘅業績表現參差，好難挽回市場信心，股價自然向下。

Michael相信，減價戰係無可避免，因為車企要推高股價，一係鬥銷量，一係鬥技術，例如自動駕駛、續航力、儲電等，或者能否喺海外市場發展。