【財經TOP SEARCH】賭股短期宜忍手

【Now財經台】截至早上11時止，過去1小時內《彭博》用戶搜尋量最多港股，依次為銀河娛樂(00027)、融創中國(01918)、美團(03690)、普拉達(Prada)(01913)及中國儒意(00136)。

澳門行政長官岑浩輝昨日(14日)發表首份《施政報告》，當中提及對關稅衝擊旅遊業及博彩業嘅憂慮，多家大行亦出報告唱淡今年賭收，以及下調多隻賭股目標價，其中，銀娛遭摩根大通劈價20%，賭股今日(15日)受壓，到底關稅對澳門賭業及旅遊業有幾大影響？

富途證券首席分析師譚智樂指，關稅造成嘅最直接影響係人仔貶值，因為會削弱內地人消費力，繼而影響旅遊業，亦會影響宏觀經濟，雖然內地已經推出好多刺激經濟政策，但都係以鼓勵消費為主，只係促進內循環，唔係鼓勵出國消費，所以旅遊業要面對高基數問題。

Arnold續指，賭股情況比較尷尬，因為股價低迷時，財務數字處於偏高水平，導致估值偏貴，資金就冇炒意欲，佢相信，要等整體經濟好轉，先會有資金再追賭股，短期好大機會跑輸及落後，佢建議「大牛市」時再考慮買入賭股。