【專家分析】吉利母企買Volocopter或要「執手尾」

【Now財經台】據外電報道，吉利汽車(00175)母公司吉利控股集團洽購德國空中的士初創企業Volocopter Gmbh控制權，此外，市傳吉利考慮再出售富豪汽車(Volvo Cars)股份，但已遭集團強烈否認，呢兩個消息對吉利有咩影響？吉利有貨冇貨又應該點部署？

元宇證券投資總監林嘉麒指，空中交通工具行業發展空間大，依家內地已經有空中的士來往深圳與珠海，另一方面，中央亦力谷低空經濟。雖然今次吉利母公司平價收購Volocopter股權，但唔可以單睇空中交通工具發展，因為Volocopter正瀕臨破產，所以吉利母公司要揼水畀Volocopter先有機會翻身。

KK續指，若吉利再減持富豪汽車會係一件好事，因為可以套現投入其他業務，雖然未知會唔會影響技術含量，但KK認為富豪汽車已經好難復原。

此外，KK建議有貨嘅投資者，可以考慮沽出部分吉利持股獲利，冇貨就可以等多陣，唔排除未來可以用更低價買入。