【專家分析】汽車4S股博反彈後宜再睇定啲

【Now財經台】內地再出「組合拳」救市，刺激A股及港股今日(24日)大升，大部分板塊都升得唔錯，當中包括汽車經銷股(4S股)，因為中國汽車流通協會昨日指，價格戰令今年首8個月新車銷售損失逾1300億人仔，咁啱今日內地公布大規模救市措施，市場係咪憧憬中央一直力谷車市，今次再出招有機會令汽車經銷商受惠？4S股之一嘅中升控股(00881)今日升近10%，成交金額逾1.4億元，到底只係跟大市升，還是睇好政府會出手打救？

亨達財富管理董事總經理姚浩然認為，若政府出手可解決公司短期現金流不足問題，但如果問銀行借錢，經營現金流仍然會係負數，所以行業長遠策略係要控制現金流失情況，而減少庫存係其中一個方法。

Patrick又指，中國汽車流通協會「求救」後，市場憧憬中央會出手，中升亦借港股今日大升而炒上。不過，行業本身最大問題係減價戰仍好難避免，所以4S股前景仍然唔明朗，如果純粹喺低位博反彈，其實已經做到，但如果做長線投資部署，仍要視乎公司有冇積極解決庫存問題，先再作考慮。