【Now財經台】中升控股(00881)今日(30日)出咗中期業績，純利大跌近50%，收入亦只係微升，基本上幾條大數都差過預期，但股價午後升幅擴大，點解會出現呢個情況，係咪意味市場認為集團最壞時期已過？
紅蟻資本投資總監李澤銘認為，暫時唔適宜睇得太樂觀，依家內地汽車市場仍面對唔同挑戰，中升主要做中高檔、豪華品牌汽車銷售，喺新能源汽車方面完全冇優勢，加上傳統車市場萎縮，相信呢個挑戰仍會持續一段時間。
佢又話，市場認為利淡中升嘅因素已經消退，即使上半年經營環境差，但中期業績仍有錢賺，加上港股今日顯著造好，中升股價就趁勢跟升，不過，長線而言，中升要擺脫經營困局仍然唔易。
