【財經TOP SEARCH】資金轉玩理財產品利內銀？

【Now財經台】截至早上11時止，過去1小時內《彭博》用戶搜尋量最多港股，依次為中國銀行(03988)，蒙牛乳業(02319)、希慎興業(00014)、佳源國際控股(02768) (停牌中) 、中國恒大 (03333) (停牌中) 。

北水愛股中行又上榜，市傳內地多家國有銀行，大額存單接近全面斷貨，反映有短期存款流走，市場估計，呢啲資金可能流向理財產品，對內地經濟體係咪好事？對內銀非利息收入係咪都有幫助？

富途證券首席分析師譚智樂指，內銀股仍然係強勢板塊，喺依家嘅市況下，已相對跌得少，對內銀股嚟講，最重要係派息能力，即使今年派少啲都唔算好誇張，整體派息能力都唔算好差。

Arnold又話，雖然內地經濟環境令貸款需求大減，但息差收窄未必係影響內銀嘅主因，貸款需求係一個「流動性陷阱」，即係想借嘅銀行唔敢借，其實市場主要擔心銀行資產質素轉差，股價表現未必對內銀股造成好大衝擊。