【專家分析】周大福未來轉型或有「陣痛」

【Now財經台】周大福(01929)上周五(12日)收市後出咗業績，股價今日(15日)顯著受壓，一度挫9%，不過，大行焦點反而落喺開店及關店數目上，摩根士丹利指，周大福淨關店數目少過預期，中信里昂就話，淨開店數目少過指引，到底呢啲數據有幾重要？

博威環球證券金融首席分析師聶振邦指，雖然周大福內地淨關店數目近90間，但佔比其實唔大，不過，市場預期，內地今年經濟應該比去年好，但今年第1季反而出現淨店舖減少，市場傾向解讀為集團睇淡未來消費市道。佢認為，集團削減店舖嘅趨勢將會持續，主要係線上銷售逐步增加，銷情亦唔錯，如果呢個情況持續，門店需求會不斷減少，周大福將資金強化網上銷售係比較合適。

聶Sir又指，實體店同網上銷售嘅收入交替，或令整體業務發展出現「陣痛」，相信市場未來會關注呢個交替銜接喺咪暢順，投資者暫時要有心理準備，周大福會繼續削減店舖，但其實係一個健康發展方向。