【專家分析】ChatGPT概念股有排炒？

【Now財經台】近期受ChatGPT消息帶動嘅AI概念股又落鑊炒，其中，百度集團(09888)今日一度被掃高18%，高見166.3元，ChatGPT係由微軟有份投資嘅初創公司OpenAI，所開發嘅聊天機器人模型，能實現撰寫代碼、回答問題、書寫論文、詩歌、劇本等指令，呢股ChatGPT係咪可以keep到，相關股份係咪會繼續受追捧？

華盛証券經紀部董事李偉傑指，ChatGPT絕對係未來嘅市場關注點，ChatGPT用戶量急速飆升，短短5日已突破100萬，加上ChatGPT可以直接完成指令，顛覆咗過往寫作及創作模式，應用上更加方便。

Jason又話，ChatGPT要達至商業化仍有待改善，因為ChatGPT有別於搜尋引擎嘅廣告模式，搜尋引擎靠關鍵字提供廣告，雖然ChatGPT唔會咁快有盈利貢獻，但唔少公司都會併軌式行ChatGPT及搜尋引擎。