【now.com財經】噚日揀咗隻恒指牛(51677)出嚟，平均買入價為0.044元，無嘢貪純綷都只係借五分鐘圖Slow STC(14.3)上返超買之後Day Trade一趟。
指數喺下半場借Slow STC(14.3)落到觸底出場後都見有借中軸慢慢上行，至2點15分終於見Slow STC(14.3)兩線上到超買位，(51677)唔貪心亦都可以選擇起身，如常的以10分鐘作為走貨時間的話，按期內(51677)高低位做過0.05元/0.047元，平均沽貨價為0.0485元，呢一趟大約一個小時鬆啲平均執4.5格或10.23%。
噚日喺作戰室臨收市前5分鐘有同戰友睇過五分鐘至小時圖見，前者Slow STC(14.3)落到超賣水平有似出觸底條件；後者條150線硬如搽咗印度神油，爭在神油幾時發揮功效。所以亦有喺作戰室提議大家出定好倉，但基於技術上擺位嘅分析，再加埋噚日仲有個美聯儲嘅議息結果未出爐同埋過夜注，又唔可以漠視風險存在。
今朝起身睇新聞見美聯儲維持利率不變，fine，大家都預咗今次係唔減住嘅，不過今年內係預咗會減嘅，咁就瞧著看啦。而美股彈升逾400點亦成事實，今朝港股開市都升逾200點，到依家9點55分，恒指升幅已經擴大至升322點，報16,865點，首兩層熊證街貨已經全數被收回，不過呢兩層嘅街貨量唔係有好多，而16,800至16,899點呢層有逾500張期指，按指數目前高位16,876點，同埋今朝早作戰室第一注好倉應市，目標係16,800點全層街貨被收回的話，佢哋又準備再開餐。
依家10點10分，恒指於小時圖上見完收補咁3月15日嘅開市下跌裂口，而喺10點打後依家行緊嘅呢粒燭仍然處於裂口頂部拉出嚟嘅量度線之上，今朝一支「大陽燭」向上有似向17,000點刺過去，但so far指數於小時圖上有似生成一粒「射擊之星」咁嘅樣嘅嘢；唯再環顧保歷加通道同Slow STC(14.3)，仍然出緊向好嘅訊號，咁希望指數暫時只係用盡咗第一道氣向上爬，依家回氣中。
恒指牛(52894)，收回價16,470點，同現價有約約400點距離，槓桿約33.08倍夠做Day Trade，企好裂口頂線拉出嚟條量度線嘅話就出貨啦；穿線當然閃人啦。而如果諗住用返五分鐘圖嘅Slow STC(14.3)做Swing Trade一趟的話，等下，佢總會向下回返落嚟嘅。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容【開市前速報】，七日免費試用：https://www.patreon.com/join/cbbcwar
