【now.com財經】噚日因為要返醫院攞藥，所以喺作戰室提早一小時收工；今日睇返個五分鐘圖見3點至4點呢段時間，恒指上落都係得廿零三十點，似乎真係唔睇市都無乜太大影響。
依家9點16分，恒指仲行緊U盤，趁呢段時間先睇咗牛熊證街貨圖，見噚日指數開市無耐先將牛證首兩層街貨收回之後，重貨區16,400至16499點嘅牛證已經被推上到成最貼價層，呢層今日見雖然有部份街貨走咗，但仍然都有逾1,200張期指，重貨仍在。至於熊證方面，第一層見16,800至16,899點，而重貨區擺位仍然見遠遠嘅17,500至17,599點，但都未及重牛過千張咁禾味。
今朝恒指升29點開市之後，喺五分鐘圖上見指數擺位仍然低於50線，同時亦喺噚日到依家延伸出嚟嘅「長方形」頂線前，由於指數比較近牛證重貨，所以作戰室今朝第一注都以淡倉應戰，而指數落到去16,430點低位後出下影線，變變下行出「錘頭」，再變成「陀螺」，睇返同噚日嘅開市格局有啲似。戰友收起淡倉格仔後反手好倉追五分鐘圖Slow STC(14.3)觸底向上，我家肥貓臭臭完做完剷屎官之後，作戰室亦傳出好倉收割訊息，指數重新跌轉升兼最高上到16,575點。
嚟到依家10點14分，我家肥貓臭臭完應該feel到爽爽所以喺度崩崩跳(哈哈)，恒指就崩崩跳返上去16,500點樓上，小時圖上見指數仍然處於150線同10線之間，保歷加通道口繼續收窄，Slow STC(14.3)兩線則出觸底，換言之指數同Slow STC(14.3)即使有條件出觸底的話，但喺保歷加通道口收窄之下，頂線下行亦都限制住指數上行空間。
話咁快嚟到10點21分，指數都變返紅燈，睇嚟今日都似用五分鐘圖做Swing Trade嘅多，仲要預埋小時圖指數被線夾住的話，上落Trade trade下隨時出「三角形」，作戰室都開始變得難玩嘅時侯，喺呢度借小時圖做Trade嘅，怕且都要比多少少時間去等指數過線先至好出手。
先抱住指數喺小時圖踩150線踩咗咁耐都仲踩得到，執住隻好倉喺手先啦。等睇見過到10/100線先至出手。恒指牛(51677)，收回價16,200點，同現價有約368點距離，槓桿有約36.82倍，唔等小時圖嘅話，借五分鐘圖Slow STC(14.3)喺超賣位出到做一趟Swing嘅Day Trade都OK架。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
