【Now財經台】蘋果公司最新季績不如市場預期，iPhone、iPad銷量下跌，收入按年分別跌逾2%及近20%，管理層又預告，今季表現唔會有驚喜，拖累在港上市手機設備股普遍向下，其中以高偉電子(01415)跌得最甘，一度挫逾5%，收市仍跌近3%，報13.64元。
紅蟻資本投資總監李澤銘指，市場預期iPhone 15會喺9月上市，唔少人會等新機開售，舊型號減價先換機，因此，第3季銷量比其他季度更差係合理。
高偉下周四(10日)出中期業績，Alan估計，上半年表現今人擔心，因為iPhone、iPad銷量都跌，Apple或減少高偉嘅定單，加上高偉本身已經係Apple主要鏡頭供應商，好難再攞到更多定單。
至於高偉下半年業績係咪會更差，佢認為仍有變數，因為Apple對iPhone 15銷情樂觀，或會提早追加零部件定單，加上頭戴式裝置Vision Pro預期明年上市，Apple可能最快喺下半年向高偉訂鏡頭。
