【Now財經台】今日外圍市場焦點之一係蘋果公司首席執行官庫克事隔兩年多再減持。至於港股呢邊，iPhone概念股似乎唔多受新機消息刺激，高偉電子(01415)、舜宇光學科技(02382)等股價持續弱勢。
高偉理應係較受惠新機銷售嘅供應商，但股價同蘋果發布會前冇大變動，今日最多跌過近5%。耀才證券研究部總監植耀輝認為，同Apple新機銷售直接關係唔大，更多受市況淡靜拖累股價，並指今日高偉成交量僅120萬股，遠低於最近3個月平均每日成交300萬股。
佢又話，高偉一向冇公布出貨量數字，相信要等蘋果銷售數據出爐，股價先有條件反彈。
至於舜宇股價就繼續尋底，今日最多跌逾2%，低見50.3元嘅逾6年低位。雖然集團分別於上月29日及10月3日進行回購，但Stanley表示，今次公司出手太奀，兩次回購合計只涉資約400萬元，其中尋日罕見地只買返4900股，自然幫唔到股價。佢續指，舜宇過去兩個月出貨量數據唔錯，但現階段唔建議撈底住。
