【Now財經台】美國最大嘅退休基金CalPERS會喺月底召開嘅巴郡股東大會，提出撤銷「股神」巴菲特巴郡主席嘅職位。CalPERS持有不足1%巴郡股份，但巴菲特持有約16%股份，擁有巴郡約32%投票權。以CalPERS手上嘅持股，真係可以動搖到股神嘅主席之位？
馬山資本董事總經理林子傑指，雖然CalPERS喺機構投資者中舉足輕重，但喺巴郡嘅股東入面，有好多都係跟咗巴菲特好多年，又賺咗好多錢嘅投資者，「逼宮」行為實際上好難做到，相信CalPERS咁做，主要係想表態唔支持巴菲特，因為巴菲特推崇價值投資，大力投資傳統能源，喺ESG、氣候變化、政策等方面嘅態度令推崇呢方面嘅CalPERS唔高興。
