【Now財經台】近排華爾街有花生食，就係科技股「女股神」Catherine Wood旗下ETF，畀華爾街基金經理Michael Burry沽空。
根據美國證交會監管文件顯示，截至6月底止，Burry旗下基金持有價值約3100萬美元，折合約2.4億港元嘅ARKK認沽期權，並再掟「女股神愛股」Tesla，現時持有價值約7.3億美元嘅Tesla認沽期權。
Burry來頭唔細，佢喺2008年金融海嘯時，靠沽空次級抵押貸款大賺幾十億美元，一戰成名做埋電影《沽注一擲》主角原型。Cathie就隔空反擊Burry，話對方唔識睇「創新科技」嘅基本因素，火藥味甚濃。
馬山資本董事總經理林子傑指，Burry沽空ARKK係好聰明，因為ARKK持股中，有好多中小型又冇錢賺嘅公司，個別沽空成本較高，沽空成個基金平啲之餘，科技股一齊冧落去，所產生嘅沽壓會比沽空個股更大，可謂一石二鳥。
