【Now財經台】聯想集團(00992)今日(19日)中午出咗業績,上季收入創新高,按年增長48%至302億美元,毛利按年增長54%,受金融相關公允值損失拖累,上季轉蝕6.4億美元,但經調整盈利按年飆1.6倍,聯想績後一度急瀉逾13%,受咩因素影響?記憶體、晶片價格不斷上升,擔唔擔心下半年控制成本能力?
元宇證券大中華股票投資總監李偉傑指,呢份業績基本面唔係真係咁差,公允值損失只係帳面,但可能「盈轉虧」呢句嚇親投資者,不過,上季毛利率略低過預期,持續向上勢頭亦放緩咗。佢又話,人工智能(AI)算力硬件、基礎建設及伺服器相關股喺10月開始跌,市場開始對AI基建前景有問號,因此,當毛利等數據差過預期,就觸發沽壓。
Jason續指,雖然動態隨機存取記憶體(DRAM)等價格已見頂橫行,冇再急升,但市場關注聯想係咪可以將呢啲成本轉嫁畀消費者,最終要睇人工智能個人電腦(AI PC)加唔加到價,以及後續定單或銷售策略配唔配合到。
