【信報財經新聞】美國上周中期大選結束，民主黨重奪國會兩院控制權，侵侵喺11月3日承認選舉大敗，明年開始直至2028年下屆總統大選，侵侵將成為「跛腳鴨」政府，但國會變天竟刺激美股上周二全面急升，只可惜呢個短暫刺激對華爾街嘅作用翌日已失效，道指、標普500指數、納指齊齊嘔凸早一日升幅，完美演繹buy on rumor， sell on fact。美股急回拖累本來上周勁升嘅港股回吐，上周五恒指回落315點至24481收市，但跌幅相較美股勁溫和；按周計恒指仍勁升1187點或5.09%。
由於晶片及科技股周五反彈，當晚帶動港股回升，夜期重返100日線之上，亦已企穩50日線。至於美股，費城半導體指數曾漲6.84%，收市仍升4.21%；納指100指數最多升2.58%，收市漲幅削半至1.35%。道指一度跌530點，收市反覆仍要跌237點或0.46%，報收51285；標指彈23點或0.31%，報收7376；納指反彈360點或1.35%，報收26989。
AI初創Anthropic原計劃以1.5萬億美元估值上市並集資1000億美元，但隨着近期AI概念股遭拋售，市場質疑其目標過高，部分投資者認為估值應降至1萬億美元，集資額應調低兩成。唔少股份周五反彈，可惜反彈阻力重重。MU剩返一半博反彈嘅貨，悉數喺718食埋糊，暫時睇住個Range係咪落喺650至750呢個範圍，可以炒住Range。NVDA曾抽高7.3%，但195已見阻力，收市升幅收窄至2.8%；周末期間驚爆CEO皮褸黃有外遇，對方更有機會係中國間謀，今早夜盤股價跌穿180，阿Man撈咗嘅貨均價194，暫時又坐艇。不過對於NVDA，雖然短線因為數據中心興建或受阻，對晶片需求或放緩，但算力始終係發展AI不可或缺嘅重要部份，以NVDA嘅先進技術，長線嚟講其晶工領導者難以憾動。
馬斯克稱，仍預計SpaceX喺明年年底年化營收將超過5000億美元；SPCX周五股價升8.6%，雖然盤中曾低見128水平，但迅速反彈重返130之上。當共和黨中期選舉大敗後，馬斯克曾自嘲指數據中心或者要搬到火星，當然呢一刻梗係當佢開玩笑。不過阿Man仔細再諗諗，數據中心喺月球或太空站興建亦非完全無可能，當然目前仲有好多問題要解決，但本來SPCX就係一間將不可能變成可能嘅高科企業，諗到呢一點，阿Man認真考慮要長線建倉SPCX，夜盤忍唔住先買咗136一注，加一注喺124，收集範圍就鎖定喺110至140，上市以嚟低位係104.83，再用100做防守，只要公司能兌現到年底年度化營收超過5000億美元，長線去博SPCX做得到不可能任務，擺返三五七年，可能變成另一隻TSLA。
儘管選舉結果反映選民強烈反對興建數據中心，OpenAI財務總監弗萊爾表示，無論政局如何變化，OpenAI都將繼續投資AI數據中心。阿聯酋投資者集團將成為OpenAI新一輪集資計劃最大投資方，承諾投入數十億美元資金。阿聯酋希望借助OpenAI的技術改進能源生產。除咗NVDA同開始建倉嘅SPCX之外，家下阿Man短炒倉仲有嘅META、GOOG同AMZN仍然持有，MSFT短炒貨喺548清咗倉，但長線貨底繼續持有，因為喺今次AI股大洗太平地之際，只要手上仲有數據中心即係GOOG、AMZN同MSFT呢啲就係贏家，至少唔使要等民主黨批准，將現有嘅數據中心升級，就可以增加算力。
暫時美股總算定返啲，主要係債息唔見再上升，至少美國10年期債息即使曾彈6.58基點報4.9005厘，都仲係壓住喺5厘之下；而2年期債息抽高7.84基點至4.5407厘。美滙指數一度升0.8%報102.36，日圓跌0.58%。
上周港股顯著上升，周四更遺下23919-24282巨型上升裂口達363點, 雖然周五略為回落315點至24481收市，但一周累計仍升1187點或5.09%，更一口氣升破20日及50日線，而於夜期時段重返100日線，目前於50日線(24410)及100日線(24588)附近進行整固。今早黑期於24500水平之上徘徊。恒指高開143點，報24625， A股再升帶動港股升幅一度擴大至最多257點，高見24738，但內地最新CPI數據公布雖然好過預期，但升幅反而顯著縮減，曾僅升19點，低見24501。恒指半日收報24531點，升49點或0.2%。大市半日成交974.12億元，又縮返晒水，而北水則錄得淨流入20.22億元。
短線而言，港股缺乏實質利好因素支持再大幅上升，目前大市仍於50及100日線密集區整固，上方24800阻力仍不少。值得留意最近現價1000點上下牛熊證再次出現嚴重失衡，比例上為近熊超過90%，而近牛不足10%之，不排除短線仍有機會受到相關衍生工具影響再挾升幾百點屠熊，並向上挑戰250日線即25400水平。不過屠熊後，如成交未見配合升勢，或出現急升後急回，再次回落至50及100日線角力，甚至回補上升裂口，如回補裂口，留意正上移之20日線將成為較大支持。
麥狄文
(徐狄怡‧證監會持牌人)
