【Now財經台】截至早上11時止，1小時內《彭博》用戶關注度上升最多港股，依次為李寧(02331)、華虹宏力(01347)、美團(03690)、聯想集團(00992)、智譜(02513)。
李寧宣布派特別息每股2.32元人民幣，折合港元每股2.71元。大摩指金額超出預期，但預料李寧利息收入會因而減少並影響盈利，涉及60億元人民幣特別息派發或會令明年純利減少1.35億元，股價暫時升幅已經收窄。雖然有派特別息，但上月底公布第3季銷售其實要跌，投資者會唔會有機會賺利息，但蝕股價？
大華繼顯執行董事梁偉源解釋，依家大市整體風高浪急，派特別息對股價有即時幫助，最近資金又轉向保守嘅內需股，所以李寧同時受惠於兩個因素。另外，Steven指公司派大金額股息或有兩個原因，可能短期業內收購合併機會不大，或公司本身未來資本開資唔需要咁大筆錢，所以就派出來回饋股東。
Steven坦言之前上半年國內經濟數據不算特別好，銷售數字都只有單位數增長，第3季甚至更差。所以如果基本因素無太大改變，今次派息對股價都只有短線支持作用，當市場冷卻後資金都唔會留喺增長唔大嘅消費股。
