【Now財經台】北水已淨流出港股逾10個交易日，據《彭博》統計顯示，截至昨日(29日)止，以金額計，北水10月走資規模係2021年以來單月最大。由於港股及A股弱，業績好依賴投資食糊嘅保險股，上季業績都麻麻，其中，中國平安(02318)第3季純利按年大跌94%，但內銀股就強勢，如果股市繼續弱勢，兩個行業表現會繼續分化？
安柏環球金融首席投資總監雷志海預期，市場將會重新聚焦內地經濟相關亮點，內地今年出口持續強勁，其實唔止受人工智能(AI)熱潮帶動，家電及電動汽車需求都持續好大，工業產出帶動上游生產鏈，令工業整體利潤變好，私人企業商業活動亦有回暖情況，零售業又出現反彈。
佢認為，市場焦點會由上半年只睇AI，而隨著熱潮降溫，開始重新調配資金去相對落後、更平，兼具投資想像空間嘅板塊。
