【Now財經台】美國聯儲局維持利率不變，FOMC有10票贊成、2票反對，其中，中間派理事庫克(Lisa Cook)係首次投反對票，亦係1992年以來，首次有理事及地區聯儲銀行行長一齊投反對票，點睇今次議息結果？未來加息機會有幾大？
臻享顧問董事總經理王良享指，相信中期選舉係今次按兵不動唯一因素，按照9月較高嘅通脹數據睇，9月加咗息，10月冇理由唔加，至於Lisa Cook嘅反對票，相信唔係純粹轉鷹，有可能針對之前美國總統特朗普(Donald Trump)向佢啟動調查嘅沉默抗議。佢又指，地區聯儲銀行喺7月有3票反對，今次只得1票，反映地區聯儲銀行認為唔需要每次都加息，加上紐約聯儲銀行等官員關注金融條件收緊及市場反應，或傾向每次加息後，預留2至3個月觀察後續影響。
Tommy又話，因人工智能(AI)硬件加價趨勢持續，加上油價回升，聯儲局12月加息機會超過70%，至於明年，據最新利率期貨顯示，3月加息機會約60%，市場或擔心年初一般會出現人工及服務價格季節性上漲壓力，通脹喺3月或仍未回落，所以仍有50%機會加息。
