【Now財經台】美國聯儲局議息結果出爐，以10比2票數維持利率不變，並喺聲明中將經濟增長用字由「穩健」改為「強勁」，主席沃什(Kevin Warsh)嘅言論亦唔係太鷹，美國現時加息壓力大唔大？議息前美國債息已回落，投資者可以點部署美債？
嘉信理財香港高級副總裁林長傑指，市場早前都偏向預期今次會按兵不動，12月加息機會較高，但仍要取決於通脹層面或油價等壓力，會唔會由供應鏈轉移至消費層面，今次投反對票，認為要加息嘅兩名官員，建議加幅都偏向溫和，根據過往經驗，若聯儲局保持溫和或漸進加息，反而有利股市，後續投資者可留意勞動數據，例如非農數據，以及通脹惡化程度，從而評估有冇進一步加息可能，但估計局方取態仍偏向溫和。
Jacky又話，美國長債息已高企一段時間，未來唔係冇加息可能，建議投資者唔好心急買長債，部署上以10年期之內、中短線債券為主。
