【Now財經台】截至早上11時止，過去1小時內《彭博》搜尋量最多港股，依次為紫金礦業(02899)、領展房產基金(00823)、中國石油股份(00857)、MiniMax(00100)、中國石油化工股份(00386)。
紫金第3季按年多賺約26%至約183.5億人仔，差過預期，高盛隨即下調目標價逾5%至48元，又提及集團黃金分部表現疲弱，抵銷銅價及產量上升嘅利好。瑞銀就話，因為期內黃金及銅交付量較預期疲弱，預期股價反應負面，並形容紫金連續兩季業績差，金價又再度轉弱，更失守每盎司4000美元水平，紫金第4季前景係咪唔太樂觀？
富昌證券聯席董事譚朗蔚指，唔同嘅金礦股份就算營運效能唔同，都會聯繫到金價，當金價持續牛氣，金礦股都會有較高增長，甚至發盈喜，不過，依家金礦股唔係咁樂觀，金價長達3年嘅牛市仍未完結，但依家去到一個較高風險水平，一旦跌穿4000美元水平，金價牛市就有機會斷纜。
Stevan又指，雖然紫金同時有黃金及銅業務，但股價亦會隨住金價調整，而30元水平係中長線重要支持位，係不容有失，但依家不論市況、金價等都似乎不利紫金，所以投資者必須審慎，而金礦股往往都會反映得較快，紫金股價已失守30元，建議投資者唔好太進取去撈底。
