【Now財經台】美國聯儲局將於明日(27日)展開一連兩日議息會議，結果將會喺本港時間周四凌晨出爐，市場之前對10月再加息預期好高，不過，據FedWatch預測，本周加息機會已降至不足10%，點解會出現呢個情況？
東亞銀行首席投資策略師彭偉偉指，雖然近期嘅經濟數據改變咗美息走向，但認為加息預期只係推遲少少，唔係唔再加息。佢又話，10月初出爐美國非農就業數據偏弱，9月消費物價指數(CPI)上升主要受油價影響，市場認為就業市場7月已開始轉弱，覺得就業及經濟轉差，所以令加息預期顯著降溫，若聯儲局主席沃什(Kevin Warsh)認為就業市場表現差，10月加息預期會進一步降溫。
Jenson又指，雖然10月加息機會唔大，但12月加息機會就好高，而明年則較大可能按兵不動，近期有部分人工智能(AI)公司嘅資本開支開始減少，美國嘅消費數據及房地產數據亦偏弱，全球市場除美國帶動嘅AI板塊較企得穩外，其他嘅經濟環節已受高油價、高息衝擊，若情況持續，明年不論加息定減息機會都唔大。
