【Now財經台】美國9月消費物價指數(CPI)升幅擴大至3.7%，但據最新利率期貨顯示，聯儲局下周議息按兵不動嘅機會高達80%，加上11月初就係美國中期選舉，點預測美息走向？市場近期擔心嘅科企巨額人工智能(AI)資本開支(CapEx)，又會唔會引爆信貸危機？
資深銀行家張泰強指，聯儲局主席沃什(Kevin Warsh)本身係美國總統特朗普(Donald Trump)提名，平時都係「口硬心軟」，只要揾到數據支持，都會調整好加息幅度及時間，加上撞正中期選舉，相信下星期都唔會加息，但值得留意係，美國通脹仍嚴重威脅基層民生，加上現時缺乏遏制通脹嘅利好消息，佢估計，聯儲局12月將會加息1次，明年亦有可能因應通脹數據再加1至2次息。
科企AI借貸開支方面，佢就話，核心問題係收益可唔可以短期內覆蓋到資本開支，不過，依家大量AI應用端仍然係免費或好難收費，企業缺乏定價權，短期內未見模型收入可以覆蓋到龐大嘅借貸成本，所以係比較擔心。
