【信報財經新聞】美國能源部周三宣布，特朗普政府將為東北部住屋供暖而設立緊急柴油儲備，期望中期選舉前遏抑燃料價格，為選舉造勢。紐約期油最多跌5.07%，低見每桶96.63美元，但收市跌幅收窄至0.68%，報97.15美元；但布蘭特期油則微升0.03%，收報108.82美元。
不過石油供應持續不明朗，摩根士丹利將明年第二季至第四季布蘭特期油預測分別上調至95、90和85美元。美國10年期債息曾跌2.91個基點，報5.0793厘，對息口敏感嘅2年期債息一度挫2.13個基點，報4.7548厘，其後都回穩。美國財長貝桑周二表示，暫未見到法國債市動盪蔓延開去，並指資金有流向美債跡象。美滙指數一度轉升0.13%，報101.837，日圓漲0.21%，高見157.84兌每美元。加密貨幣「一哥」比特幣最多升1.3%，至83848美元。
美股周三反覆，道指高開156點後，一度轉跌103點，低見52392點，其後輾轉向上，道指收市升360點或0.69%，報52856；標指升44點或0.58%，報7757；納指升278點或1.05%，報26702。不過唔少股份喺收市盤後同夜盤都碌返落去，阿Man臨瞓前放咗嘅止盤，全部中晒。GOOG跌1.6%，為表現最差道指成份股，不過阿Man嘅短炒倉係328嘅貨，用300做防守，暫時仲係安全。MSFT保住升幅，但只係微升0.2%，但守住條20日線525，短炒倉嘅貨495都無郁過。至於META仲坐緊艇，防守位680，一樣健在未死得，盤後上返708，但725均價嘅短炒貨，仲未見家鄉。
INTC夜盤穿咗90，淨返92同95嘅貨，80做防守，未死得，但着晒燈都危危地。上述嘅短炒貨未走，但開市無耐，DELL上到502，忍唔住擺咗部分貨喺500減磅，因為有兩口貨係498同490買，唔想好似500樓上嘅貨輸住走，淨返465同450嘅貨，暫時又擺返個465同450條100日線附近睇接唔接到，接唔到彈上去，就望企返條10日線514。MRVL均價260嘅貨，本來都有啲信心，無奈260呢個位剛好係20日線，10日線就252，臨瞓前見仲有246，想博上返250樓上，但都擺定個245止蝕先，結果人都未瞓着，就打埋個245，今朝見夜盤連240都穿埋，50同100日線失守，係條20周線，都係等個240企返穩再算。
MU本來860淨低嘅一注唔多想走，但見上到920又唔多想走，瞓覺前擺返個900止賺，結果又中咗，依家又擺返個880同860接，同樣用個850做防守。ALAB早一日上返300好地地，但噚日又失守，280嘅止盤，今早盤後未中，但見其他嘢碌緊落山，285都投咗降先。LITE前日喺870減咗貨，淨低810同820嘅貨未敢掉而輕心，臨瞓又擺咗個850止賺，瞓醒就見吉咗倉，盤後穿埋820，打回原形，暫時未有擺盤撈貨，都係睇定啲先算。暫時個短炒倉減咗一半貨，再有震盪都有子彈買貨。
NQ噚晚曾經反彈至30000樓上係威係勢，可惜30000喺夜盤得而復失，再穿埋噚日個分水嶺30800就食咗瀉藥咁，至阿Man執筆時，29600亦失守，暫時睇下個29500守唔守到。今晚NQ分水嶺29600，支持29500/29400/29300，阻力29700/29800/29900。
恒指噚日高開271點即急速回落，24000關得而復失，最多跌247點，至三個月新23620喘定，但最終報收23651，跌215點，接近低位收市，由10月初至今累跌近4%。北水喺黃金周長假後未見活躍，更已連續6個交易日錄得淨流出，雖然主板成交金額只1766億元，沽壓唔算嚴重，但同樣顯示至現水平亦未見有更多資金願意入場接貨，顯示市場氣氛不濟。不僅北水走貨，季績公布亦對大市構成壓力，中移動(00941)今年首三季純利按年下跌7.9%，淨利潤率由14.5%降至13.6%，差過預期，噚日大陰燭下挫3.66%；同業聯通(00762)半年業績時出乎意料停派中期息，傳統中特股減少分派，本來呢類股份係靠派息吸引投資者，如今減少分派，高息不再。另一方面，寧德時代(03750)業績同樣不及市場預期，雖第三季純利按年上漲14.9%，但增長動能減弱，股價繼周二下跌6.58%後，噚日再急跌11.41%，收報364.8元，股價較歷史高位「腰斬」。
業績期市場氣氛偏淡，企業業績如未能超乎預測，已變成負面因素，引發拋售壓力。恒指跌穿上月低位，雖然夜期時段一度隨美股反彈，可惜最終獨自憔悴，一度跌穿23600水平，最終險守23600，但今早黑期已失守23600，恒指低開138點，報23513，內地已瘋傳多日，內地投資者要沽貨交稅，今日係最後期限交條數出嚟，淡友借機發難，大市跌勢極速擴大，半日恒指最多跌699點，低見22952，跌穿兩萬三關口。恒指半日跌679點或2.87%，報22971點；大市全日成交1274.53億元，北水淨流出31.15億元。
傳聞呢兩日係死線，即係再唔交數之後要重罰，呢個傳聞下，令到本來已弱不禁風嘅港股更為崩潰。今早大市低開低走，半日已殺咗幾千張期指嘅牛證，穿咗23000都未識反彈，不過單日已做咗超過600點波幅，就算下半場再落都係一百幾十點嘅事。但今日打穿咗23650呢個由去年低位19260反彈至年初高位28056嘅浪段黃金比0.5，睇嚟上次個低位即係呢一個浪段嘅0.618回調黃金比大約係22620，稍後有機會見多次，甚至跌穿，再創今年新低。
麥狄文
(徐狄怡‧證監會持牌人)
