【Now財經台】內地第3季國內生產總值(GDP)按年增長4.5%，超預期，首3季則增長4.6%，其中，9月零售按年增長1.1%，高過預期嘅0.5%，增速亦較8月快，零售數據表現突出，有分析認為，同中秋節及低比較基數有關，點解讀今次嘅數據表現？有冇驚喜？
渣打大中華區經濟師陳冠霖指，零售按月增長由8月嘅負增長，轉為9月嘅正增長，當中涉及基數效應，因為去年9月基數較低，所以按年就出現反彈，渣打原本都預期9月零售增長約1%，所以實際增長係符合預期。
分項數據方面，Hunter又指，烟酒及電子產品零售增長升幅較顯著，但受汽車銷售及房地產相關環節拖累，尤其係建築、佈置材料及家具等，反映消費品零售表現仍相對弱，不過，服務零售增長則相對平穩，反映大眾消費行為有少少轉變，由傾向商品消費轉為傾向服務消費。
