【信報財經新聞】美國再有數據顯示通脹壓力加劇，AI相關股份繼續捱沽，尤其負債比率較高股份，沽壓較大。不過個別股份低位有承接，美股周四反彈，道指高開236點後，最多升628點，高見52250；標指與納指先跌後升，標指曾跌0.64%，納指一度挫1.44%，資金流入避險資產，債市回升，債息略為回落。美市收市，道指顯著回升556點或1.08%，報52177；標指倒升25點或0.33%，報7744；納指扭轉跌勢，略為回升20點或0.08%，報26713。
晶片股受壓，NVDA、INTC及AMD收市跌幅介乎1.5%至2.8%；其中，INTC盤中一度急跌8.3%，不過未有跌穿阿Man個防守位90，見90守到就92再買埋最後一注，均價都要接近98，盤後雖然上返96，但唔企返 上返100，個心都係唔舒服，總之90不容有失。MU一度，本來係訂咗880穿要走佬，均價915嘅貨，開市插水7.1%落到858，逼近30周線845，但見開市一刻兵荒馬亂就睇多陣，因為個納指RSI 2低到穿咗2，博個納指噚晚有反彈， 860再加碼，用返個845做防守，收市轉升1.9%，930先減返兩注貨，860嘅貨就博佢彈返上50MA大約係977，暫時要觀察下980會唔會由之前支持變阻力。NBIS均價190嘅貨，又係一開市秒插，低見163，逼近250日線158，可惜160個買盤中唔到，見彈返上180照加多注，均價大約187，睇下今晚仲有冇反彈上返200企穩。
至於CoreWeave因為債務違約風險急升，股價一開市倒水，一度考驗60，好彩阿Man早一日喺75全數投降。不過Nvidia行政總裁黃仁勳對此表示，CoreWeave實力每日增強，資本成本實際上有所降低，Nvidia毋須向CoreWeave提供財務支援，其股價見支持收市倒升5.9%，結束此前連續3個交易日下跌趨勢，只係阿Man已換馬至NBIS，咁就無再上返車。LITE又係遇上開市急跌嘅情況，900同880接咗嘅買盤，850-870開市秒穿，走都走唔切，唯有等一等，見落到800後有啲支持，810同820轟多兩大注落去，盤中彈到870，減返890嗰兩注貴貨，815均價呢兩大注等住報仇，875條50MA千祈咪再穿。暫時用返850做防守。ALAB開市曾落到280邊，但守得住，沽壓唔算嚴重，暫時305均價嘅艇咗少少，總之守到280就持有先。MRVL再上返車260均價嘅貨，盤中穿230後總算靠穩，收市上返240，條50同100日線險守，睇下今晚仲有冇反彈上返260-280，皆因見個債息落返啲，估計個市恐慌拋售咗兩日，應該可以定翻啲。其他貨無郁過，暫時係DELL最大鑊，阿Man對DELL嘅估計係樂觀咗，兩日股價由550直播到噚晚低位452，見上返100MA，企返穩460，加多一注大嘅465，數量相等於518均價嘅貨，咁樣溝一溝，均價拉到492左右，暫時睇下條20MA個467守到，可唔可以再彈返去500-550呢啲位，留意個550會唔會變成阻力。
雖然呢兩日阿Man將本來空虛嘅短炒倉又填返滿咁滯，一個調整令到個別股份坐咗艇，好彩呢兩日個NQ都幾易炒，急跌成千點噚晚都係落去搵支持博反彈，29800早段彈到29950企唔穩先撤退，開市急跌至29700附近再試渣，可怕彈到29850又企唔到，穿埋29700當然唔敢輕舉妄動。直至29600見支持，29638渣等反彈，目標係29900-3000左右，臨瞓前等到30050，但企唔穩又唔想過夜，30038平倉，都有唔錯收穫。今早夜盤當然無集中睇NQ，結果企埋個30050條50MA就發力，彈到上30200左右，暫時反彈阻力都係30300至30400。至於今晚個分水嶺30150，下方支持30050/29950/29850/29750-29700，上方阻力30250/30350/30400-30450。
資金避險下流入債市，美國10年期債息曾下滑15.02個基點，低見5.0351厘。美滙指數一度回吐0.66%，報101.878；日圓升0.49%，至157.55兌每美元。歐羅漲0.75%至1.1244美元。現貨金最多漲1.76%，至每盎斯4177.6美元。油價反覆，紐約期油升3.03%，每桶收報97.97美元；布蘭特期油曾跌2.54%，低見103.37美元，收市回吐0.13%，報105.92美元。國際能源署(IEA)表示，成員國同意釋放3月為穩定油市而採取干預行動中剩餘一億桶石油。
港股噚日低195點，盤中一度跌368點，低見23954，其後跌幅收窄至251點，二萬四關失而復得，報收24062。成交額增至2241億元，較上日略為增加，反映24000水平似有資金願意入市。至夜期時段，美股三大指數反彈，夜期及ADR隨之回升，更重上24200水平，今早黑期亦於24200水平之上徘徊，成功收復10日線及5日線。今早恒指高開258點，報24321，開市即收復10日線，其後升幅擴大至329點，高見24392，可惜仍然受制20日線，即24400-24450水平。半日升290點，報收24353，半日成交只有928.44億元，北水淨流出7.42億元；周一假期，預咗今日成交會靜局，北水長假前減貨亦合理。留意今日5日線即24250及10日線約24150再能再失，再失守嘅話，下星期個市瓜多過菜。
港股於本月多次下探二萬四水平，暫時23700至24000水平似乎有不俗支持，不過成交持續萎縮，反映港股仍缺乏動力，若然短線反彈一直受制20日線，即24440水平，被困於下降通道底部之內，再向下回測23800/23600/23400水平尋找支持。相反，如大市能重返20日線並企穩於24500水平之上，則有望扭轉短線弱勢，於月內再度回試100日線約24800及50日線約25000水平，但24800-25000水平阻力仍大。
麥狄文
(徐狄怡‧證監會持牌人)
