【Now財經台】近期人工智能(AI)債務問題備受關注，AI雲計算服務公司CoreWeave獲英偉達(Nvidia)行政總裁黃仁勳護航，指公司財務有改善，唔使Nvidia出手，呢句說話刺激CoreWeave股價昨晚(15日)倒升近6%，但集團未來幾年資金缺口最少800億美元，雖然5年期信用違約掉期(CDS)回順，但仍近10厘，反映債務危機未除，短期係咪不宜沾手？
信誠證券及期貨投資服務部董事蕭猷華指，CDS利差曾逾1000個基點，債息上到15厘，已去到幾危險嘅警戒線，因為債息、CDS咁高，喺一級資本市場係唔可以融資，所以市場擔心未來債務風險再升溫，不過，CoreWeave手頭上有過千億美元定單，可抵銷到債務缺口。
Tony又話，美國通脹及債息持續上升，都會加大AI企業債務負擔，因為好多資本開支(CapEx)大嘅雲計算公司，都做咗好大槓桿，當未來冇匹配嘅盈利，財務就會出現問題，但佢認為，暫時嘅情況唔算太惡劣。
