【Now財經台】金融股昨日(13日)有得升，但今朝(14日)就回套，其中，友邦保險(01299)股價連升5日後，今早一度跌1.6%，低見71.85元，過去5個交易日，友邦好倉都有資金食糊離場，今日好友有冇趁跌入場博反彈？條款應該點揀好？
星展香港環球金融市場上市產品主管周國威指，友邦10月初受英國方面嘅消息拖累，跌穿70元心理關口，但當時未見資金積極撈底，反映傳統金融股或較少散戶關注，大部分集中人工智能(AI)概念股，不過，少散戶炒或令股份反彈阻力較細，令友邦近日反彈幅度大過滙豐控股(00005)。
Dick又話，雖然市場上有逾10倍嘅高槓桿條款，但年期多數偏短，由於依家市況唔算好強，所以唔適宜揀咁短身嘅產品，建議留意明年第1季到期、行使價約75元嘅貼價CALL，槓桿約7倍，要留意友邦收復70元關口後，可唔可以進一步上試75至80元。
