【Now財經台】美國大行陸續派成績表，其中，富瑞股票交易係今個季績期最大驚喜，除咗花旗，其他美國大型銀行都交靚績，統計4家銀行業績，股票交易收入金額更罕有地超越固投收入，雖然業績強勁，但股價冇得升，更拖累美股3大指數昨晚(13日)收市向下，點解會出現呢個情況？此外，摩根大通發債集資70億美元，會唔會限制咗後市表現？
泓瀚資本董事盧志威指，銀行股見光死主要因為市場情緒差，所以投資者反而趁業績唔差沽貨，加上股價之前已升咗唔少，所以出現技術性調整，但佢認為，銀行股整體數字及預測其實唔錯，所以唔使太擔心。
William又話，花旗表現特別弱係個別公司及季度問題，唔可以因為咁抹煞成個行業，市場後續仍有Anthropic及OpenAI等大型新股上市憧憬，可以為投行業務貢獻唔少收入，但傳統及零售業務就相對看淡。
至於摩通發債，佢就話，如果短期內有大型新股IPO憧憬，表現應該還好，不過，未來新股號召力及估值或會轉弱，到時金融股會回歸平淡，如果短期跌得急可以考慮撈底，但唔預期股價會大升。
