【信報財經新聞】美股上周五反覆向好，科技股普遍回升，道指周五最多飆533點，收市仍漲423點或0.83%，報收51654；標指升46點或0.59%，報收7811；納指升172點或0.64%，報收27366。馬斯克旗下SpaceX宣布，同意收購一套覆蓋全美國低頻段頻譜牌照組合，用於提供流動通訊服務，進軍電訊市場。SpaceX周五股價一度急升3.6%，收市仍升1.3%。受競爭將加劇的擔憂影響，三大電訊股或受威脅，電訊商T-Mobile US股價瀉13.3%，AT&T挫9.8%，Verizon滑落8.8%。Tesla升2.1%，亞馬遜升3.3%。蘋果據報削iPhone 18 Pro及Pro Max零件訂單，股價挫1.1%。蘋果據報已通知部分供應商，削減新推出iPhone 18 Pro和iPhone 18 Pro Max零部件產量，單單10月訂單已減少15%至20%，原因係記憶晶片成本近期急升促使蘋果產品加價，抑制消費者需求。
阿Man上星期三放假去咗旅行，其實都無乜理過個美股短炒戶口，除咗星期三喺1023買咗MU，當晚1083見有5%已經食埋，之後再又擺返20MA同30MA之間嘅1025又接返半注，另一個買盤放咗喺985接近50日線再接多半注，暫時呢個買盤無中過，如果中埋呢兩注均價大約係1005，條100日線喺970，咁就用返個950做防守。CRWV之前有一注86嘅貨，連續兩日都企唔到90收市，但掛住去玩，見股價又無穿80繼續持有，今晚如果繼續守到80，或者加多一注。MRVL喺218買嘅貨，食咗一半279，忍唔住喺278又撈返，但撈返呢一注就用250做防守，暫時仍然持有。NBIS出發前一晚，減咗一半249，仲有一半219嘅貨未走，今晚睇下230上唔上得返，上唔返或者走埋啲尾數算。至於DELL兩注分別550同535嘅貨繼續持有，用返550做防守。INTC條最後防線喺100，115撈咗一注嘅貨，無啦啦坐艇咗10%，今晚望實條最後防線，亦係條50MA，守到或者加多注。至於今晚NQ分水嶺31250，支持31150/31050/30950/30850，阻力31350/31450/31550-31600，31600亦接近前頂31616，企得穩就唔估頂。
特朗普表示與普京同意，俄羅斯將立即向美國及全球市場供應超過30萬噸柴油，11月再供應50萬噸，喺美國中期選舉後立即追加供應100萬噸。此外，根據俄羅斯煉油廠實際狀況，俄方亦將於短期內供應300萬噸柴油。不過油價仍然高企，紐約期油反覆升0.39%，每桶收報91.85美元，布蘭特期油彈0.42%收報104.72。至於美國10年期債息曾漲4.7基點至5.276厘，2年期債息升6基點至4.816厘。美滙指數一度升0.2%至102.34，歐羅跌0.22%，日圓降0.35%。彭博報道，歐盟及中國表示，雙方已就混合動力汽車達成協議；歐盟委員會稱，中國混合動力車及插電式混合動力車對歐盟出口可能減少一半以上。不過今日港股呢邊啲車股表現麻麻，其中小米(01810)半日更跌近5%，成為半日表現最差藍籌股。
睇返港股呢邊，上周港股表現反覆，初段恒指曾升至24354高位，以兩日時間完全補回本月2日下跌裂口24099至24332，不過之後又連跌兩天，一度跌至23737見 3個月新低。周五恒指卻高開156點，順勢升達425至24211收市，完全收復周四跌勢，按周則回升239點或0.99%，總算成功收復5日線。至夜期時段，升勢進一步擴大，最高升至24427高位，並成功收復10日線，今早黑期亦於24300水平之上，並逼近24400徘徊。恒指高開223點，報24434，升幅一度擴大至最多244點，高見24455後現回吐，升幅逐步縮減，一度僅升22點，低見24234點。恒指半日挨近低位收報24253，升42點或0.17%。大市半日成交861.56億元，北水淨流入31.32億元，不過北水回歸後半日連1000億成交都唔夠，暫時又幾明顯畀條20MA，大約24500頂住，暫時險守10MA，若然下半場連24200都失守，睇怕又再要考驗一下24000心理關口嘅支持。
由於今朝恒指高開低走，個上升裂口僅差10點未完全回補，半日唔夠就補晒個上升裂口，可見港股真係欠缺動力。留意中國本周三將公布CPI及PPI數據，美國同日亦將公布CPI。暫時港股仍缺乏上升動力，上周五急升似為挾淡倉，殺熊證作部署，但今早未有進一步往上挑戰熊證重貨區24500-24650。而日線圖明顯仍為空頭排列，如大市一直無法改變空頭排列，大市反彈仍為一頂低一頂狀態，而短線反彈若未能突破24800及企穩100日線之上，料再回復跌勢，後市暫仍難樂觀。
麥狄文
(徐狄怡‧證監會持牌人)
